«مخدر الآيس حوّل الأم لجلاد… إعدام أم وزوجها بعد تسليم ابنتها القاصر»
القضية دي حصلت في أبو قتادة بولاق الدكرور
قضية غريبة ومخيفة واللي حصل فيها صعب على أي عقل يستوعبه
محكمة جنايات الجيزة أصدرت حكم بالإعدام شنقًا على أم وجوزها بعد ما مفتي الديار وافق على الحكم
التهمة إن الأم قدمت بنتها القاصر لجوزها التاني مقابل مخدر الآيس
مصراوي نشر نص التحقيقات كاملة
ودي أقوال الأم قدام النيابة زي ما قالتها بنفسها
قالت إن البنت اللي حصلها كل ده هي بنتها
وقالت إنها كانت متجوزة أبوها زمان لكن اتطلقوا سنة 2018
وسبب الطلاق إن الأب مكانش بيصرف ومكانش ثابت في شغل
بعد الطلاق أجرت شقة في أبو قتادة وقعدت فيها هي وبناتها
وكانت بتشتغل عند الناس في البيوت علشان تصرف عليهم
بعد كده اتعرفت على واحد اسمه عصام
وقالت ده جوزها الحالي
اتجوزوا سنة 2019 وخدت بناتها وعاشت معاه
في الأول كان كويس ومحترم
بس بعد أول أسبوع اتغير
بدأ يضربها ويزعق للعيال على أي حاجة
وبعد شوية اكتشفت إنه بيتعاطى مخدرات في البيت
قالت إنه ما وقفش عند كده
ده بقى يكلمها عن المخدرات ويضغط عليها تشرب معاه
وبالفعل بدأت تشرب
وكمان حاول يخلي بنتها الكبيرة تشرب آيس لكنها كانت بترفض
وقالت إن سبب ضربه ليها دايمًا إنها كانت بتكلمه في مصاريف البيت
وإنه كان بيصرف فلوسه كلها على المخدرات
في الأول حاولت تمنعه يشرب في البيت علشان العيال
بس هو أقنعها تشرب معاه
وبقوا الاتنين بيتعاطوا في الشقة
وقالت إن المخدرات غيرتها
بقت مهملة ومش مركزة ولا فارق معاها حاجة
ولا نفسها ولا عيالها
ولما بنتها رفضت تشرب
قالت إن جوزها ضربها وكتفها
وصورها فيديو وهي بتقول كلام عيب
وأجبرها تقول إنها تعرف رجالة غيره
ولما اتسألت ليه ما بلغت الشرطة
قالت عشان كان مهددها بالفيديوهات
ومانعها تخرج من الشقة
وقالت إنها في مرة صحيت الفجر
ولقت جوزها في حالة غير طبيعية
وبيحاول يقرب من بنتها في الصالة
ومن هنا المشاكل كبرت واتطلقت منه
بس ما قالتش لأهلها أي حاجة
لا عن الفيديوهات ولا اللي حصل مع بنتها
كل اللي كان يهمها إنها تطلق وخلاص
بعد الطلاق بشهر
قالت إنه رجع كلمها
وهددها إنه ينشر الفيديوهات
وقالها لو ما رجعتش هي وبنتها هيعمل كده
في الأول رفضت
بس بعد تفكير رجعت وكلمته
وقالت له هعمل اللي انت عايزه
وقالت إن بنتها وافقت
وقالت لها حاضر يا ماما طالما ده هيريحك
وساعتها رجعت له
وفي يناير 2024 كتبوا الكتاب من جديد واتجوزوا
واعترفت إن جوزها كان بيقرب من بنتها وهي موجودة
وقالت إن السبب الرئيسي اللي خلاها تعمل كده هو مخدر الآيس
وإن المخدر خلاها لا مبالية ومش حاسة بأي حاجة حتى تجاه عيالها
وقالت إن اللي حصل استمر من 20 يناير 2024 لحد 16 مايو 2024
ولما حاول يقرب من البنت التانية
هربت ببناتها وراحت تقعد عند واحدة ست كانت بتشتغل عندها قبل كده
ولما اتسألت ليه ما بلغت
قالت إنها كانت خايفة منه يعمل فيها وفي عيالها حاجة
وفي آخر التحقيق قالت
أنا مش فاهمة عملت في نفسي وفي بنتي كده ازاي
بس المخدر هو السبب
