ناريمان صحبتي عروسة جديدة
يكون عصبي زيادة عن اللزوم وصوته طول الوقت عالي وعيونه كلها شر.
كأنه بيقولي انتي كشفتيني بس أنا هخليكي عايشة زي المجنونة مش عارفة الحقيقة من الوهم.
علشان كده بعتلك يا شهيرة
ملقتش حد غيرك يفهمني أنا صح ولا غلط.
مشكلة ناريمان غريبة عليا!
إزاي تتجوز اكتر واحد بتحبه ويكون ده حالها من أول اسبوع معاه.
وليه هو تعمد يكون طبيعي قصاد الدم وعايز يجننها بالشكل ده
كل ال في بالي دلوقتي أن عبد العظيم ملبوس
أو أو هو شيطان أصلا.
مش معقول شاب يسيب أهله في الأقصر ويجي يعيش في القاهرة ومحدش شاف أهله غير يوم الفرح وبس..!
ناريمان اجمل بنت فينا
وقعدت فترة شاكين أن ليها جن عاشق.
واول ما اتخطبت لعبد العظيم ده من بعد ما كانت بتكره الرجالة وعدوانية كلنا نصحناها بلاش الشخص ده شكله مش مريح إلا هي.. كانت واقعة في حبه بطريقة مش عادية.
وده لوحده كافي يأكدلي ظنوني دلوقتي!
عبد العظيم مش إنسان طبيعي.
محبتش اصدم ناريمان واخوفها
وقولتلها أنا هفضل معاكي هنا لحد ما جوزك يرجع ومش همشي إلا ما اطمن عليكي.
قضيت معاها اليوم بساعدها في البيت وبحاول اخليها تنسا ال حصل.
وبدأت تستجيب معايا وتاكل ووشها ينور من تاني.
الساعة جت سبعة بليل ودق جرس الباب
منكرش خوفي وقبضة قلبي وقتها لكن ادعيت الثبات علشان صاحبتي متخافش.
قامت ناريمان فتحت الباب
ودخل عبد العظيم وشه مقلوب مجرد ما شافني.
ولقيته فجأة بيقولي شهيرة صح
رديت بأبتسامة مصطنعة اه شهيرة.. الف م…
قبل ما اكمل لقيته بيقولي طب يلا اطلعي برا.
حسيت بحرج شديد وناريمان برقت وقالتله انت بتقول ايه بيهزر يابنتي.
كمل هو كلامه بنفس الحدة وقال لا مبهزرش اطلعي برا بجد يلا إيه دخلك هنا.
ماكنتش عارفة أتكلم اقول ايه
لكن كل ال عارفاه إني مش هينفع اسيب صاحبتي مع شخص زيه عايز يبعد عنها أي حد يساعدها.
رديت بتحدي وقولتله أنا في بيت صاحبتي مش بيتك ولو نزلت هاخدها في أيدي مش هسيبهالك
بدأ يضحك بصوت عالي وقالي شوفتي الموضوع يضايق إزاي.. اومال كنتي بتسلطيها عليا ليه ايام الخطوبة أنها تطردني وتقفل كل الابواب وعايزة تخربيلنا الجوازة.
اتصدمت أنه شاف المحادثات القديمة ال كانت بينا
فعلا أنا كنت بقولها كده وبحاول اقنعها تبعد عنه.
لقيته قعد على الكرسي ال قدامي وناريمان جت قعدت جنبي على الكنبة وقالي عموما أنا بهزر.. كنت بردهالك بس.. ها صحبتك قالتلك اسرار البيت ولا لسه.
معرفش ليه كنت حاسة أن انا وناريمان في خطر قصاده ويمكن تحصل مصيبة دلوقتي.
وعلشان مياخدش باله من ال عايزة اعمله طلبت اني أدخل الحمام..
وقومت دخلت الحمام وبعدين خرجت تاني اتسحب بشويش لحد ما وقفت وراه.
ناريمان كانت شايفاني وانا شاورتلها تسكت متتكلمش.
كان قاعد بيتكلم معاها بصوت واطي وبيقولها تاني يا ناريمان بتدخلي صحابك بينا مش قولنا المشاكل دي تخصنا احنا بس.
كان في أيدي طرحة طويلة رميتها عليه بسرعة وربط جسمه في ضهر الكرسي وبدأت اقول عليه اية الكرسي بصوت عالي
في نفس اللحظة هو كان بيحاول يهرب ويفك نفسه وناريمان بدأت تكتفه معايا علشان نسيطر عليه.
خلصت شوية آيات قرآنية حفظاها.. وهو بدأ يهدا تماما ميتحركش.
وبعد ما خلصنا انا وناريمان بصينا لبعض مش فاهمين هو كده اتعالج وخرج من عليه ولا ده سكوت مع قبل العاصفة.
ومجرد ما انتهينا لقيناه بيضحك وبيقولنا انتوا اقسم بالله مجانين وعايزين تتعالجوا.
بصيت له باستعجاب وقولتله بخوف أنت مش طبيعي.. ومش حاسس بنفسك…
ناريمان بدأت تبكي وقالتله فوق يا عبد العظيم.. أنا تعبت من الخوف معاك.. انت ليه بقيت كده.. لو عليك حاجة قولي وهنجبلك شيخ بس متخوفنيش كده.
كان واضح أن عبد العظيم واخد الموضوع بهزار وقالنا هو انتوا بتتكلموا بجد ولا ده مقلب من بتاع النت وكده مانا مش فاهم في إيه.. الهانم منكدة عليا أول أسبوع جوازنا وجايبة صحبتها تقرا عليا كمان.
حاولت اكشف الموضوع على حقيقته اكتر وطلعت صورة الملاية ال عليها دم وقولتله تقدر تقولي إيه دي
رد باستهزاء وقالي دي ملاية.
ناريمان صرخت وقالتله والدم ده ايييييه مش شايف.
رد وقال دم ايه انتوا مجنانين دي ملاية عليها ورد عادي واللون بهت على بعضه دي جزاتي اني غيرتلك الملاية وبساعدك في البيت يعني .
كلام عبد العظيم كان منطقي.. وطلبت من ناريمان تدخل توريني الملاية قالتلي في الغسالة جوا.
دخلت اشوف الملاية وسبتهم برا بيتكلموا سوا
وفعلا.. لقيت الملاية عليها رسومات بهتانة كلها باللون الاحمر وشكلها زي الدم الملطخ.
وانا في المطبخ حسيت أن صوتهم برا بقا اهدا ومش سمعاهم.
خرجت وانا بكح وبعمل اي صوت وبقولها ناريمان بقولك .
لكني خرجت ملقتش حد فيهم
ناريمان وعبد العظيم اختفوا!!
هو ده ال كان عايزه عبد العظيم من اول ما شافني
كان عايزني اغيب عنها علشان ياخدها ويختفي.
وده ال حصل بالفعل.
ناريمان متغيبة بقالها أسبوعين ومحدش عارف يوصل لأي معلومة عنها.
