خيانة الصداقة تنتهي بالإعدام.. صاحبة العمر تقتل “ملاك الخير” داخل عيادة بالمول
اللي قدامك دي اتقتلت علي ايد صاحبة عمرها
النهاردة هتكلم عن واحدة من أندل الجرايم اللي ممكن تسمع عنها، جريمة خيانة عيش وملح وصداقة استمرت 5 سنين، وانتهت بدم بارد في مكان المفروض إنه أمان، عيادة رمد في قلب مول تجاري.
نجلاء نعمة الله، بنت في العشرينات من كفر الدوار، الكل كان بيسميها ملاك الخير، طالبة مجتهدة بتشتغل سكرتيرة عشان تصرف على دراستها وتساعد المحتاجين، أي حد في المول كان بيقع في ضيقة كان بيروح لنجلاء، كانت هي السند والضحكة اللي مبتفارقش الوش، ومكنتش تعرف إن قلبها الأبيض ده هو اللي هيجيب نهايتها.
المتهمة نورهان أو صديقة العمر، دخلت حياة نجلاء برسالة على فيسبوك من 5 سنين، مثلت فيها دور البنت الغلبانة اللي عايزة صاحبة جدعة، ونجلاء بقلبها الطيب فتحت لها بيتها وحياتها، وشغلتها مكانها لما كان بيبقى عندها امتحانات، نورهان كانت بتراقب كل تفصيلة في نجلاء
معاها كام، بتلم جمعية بكام، لابسة دهب إيه؟
الحقد كان بيحرق قلبها من حب الناس لنجلاء وكرههم ليها، وهي دي اللحظة اللي الشيطان سيطر فيها على نورهان لما شافت نجلاء تعبانة وكل أصحابها ملمومين حواليها بيخدموها، في الوقت اللي نورهان في خطوبتها مفيش حد راحلها، هنا قررت نورهان إن نجلاء لازم تختفي، مش بس تسرقها، لا دي تاخد مكانها في الشغل وفي حب الناس.
يوم الجريمة
نورهان استعانت باتنين من قرايبها مجرمين، وراحت لنجلاء العيادة وهي جايبالها عصير، نجلاء رفضت تشرب، فنورهان نفذت الخطة البديلة دخلت الحمام ومثلت إنها وقعت وأغمى عليها، نجلاء بلهفة جريت عشان تلحق صاحبتها، وفجأة طلع لها مصطفى ومحمد.
اللحظات الأخيرة في حياة نجلاء كانت صعبة
كتموا نفسها، ونجلاء بتبص لصاحبتها وهي مش مصدقة، نورهان كانت واقفة بتتفرج ببرود، نجلاء صرخت وقالتلها
حرام عليكي يا نورهان، الحقيني..
لكن الرد كان صادم، نورهان قلعت نجلاء الحجاب بتاعها وادتها للمجرم عشان يخنقها بيه، وما اكتفتش بكده، دي دخلت المطبخ جابت سكينة وضربت نجلاء في راسها وجسمها عشان تتأكد إن ملاك الخير مش هتقوم تاني.
بعد ما خلصوا، سرقوا الفلوس والموبايلات، وكسروا الكاميرات وقطعوا الأسلاك، ونورهان خرجت من المول ببرود غريب، ولا كأنها لسه دابحة اللي كانت بتقول عليها أختي، والمفاجأة إنها بعد الجريمة راحت قعدت مع أهل نجلاء وكانت بتعيط معاهم وتمثل إنها منهارة من الصدمة.
بداية التحقيقات
رغم إنهم كسروا الكاميرات، لكن رجال الأمن قدروا يرجعوا تسجيلات السيرفر وفضحوا نورهان وهي داخلة وخارجة، وفجر تاني يوم كانوا كلهم مقبوض عليهم
جلسات المحاكمة
في 2025 محكمة النقض قالت كلمتها النهائية الإعدام شنقاً لنورهان وشريكها الأول، والسجن 15 سنة للشريك الثالث لأنه كان قاصر.
الرسالة اللي لازم تفهموها إن الغيرة لما بتدخل القلب بتمحي منه أي رحمة، وإن مش كل حد بيقولك يا صاحبي بيبقى سندك، ساعات بيبقى هو اللي بيحفرلك قبرك وأنت بتضحكله، نورهان ضيعت نفسها عشان شوية فلوس ومكان في عيادة، ونجلاء راحت لربها وهي شهيدة غدر، اتقوا شر من أحسنتم إليه، وخلي بالكم من النفوس الصفرا اللي مبيملاش عينيها إلا التراب.
