ما يحدث بعد منتصف الليل لم يكن في العقد!»
نفس جمب ودني الشمال ، اول ما سمعت النفس بصيت علي شمالي بسرعه وانا قلبي بيدق من الخوف ، بس اول ما بصيت شمالي حسيت بحد نفخ في ودني اليمين ، اتنطرت من مكاني وانا بترعش ، وبقيت ابص حواليا وانا خايف ، بس في اللحظه دي لقيت تليفوني رن ، طبعا انا من الخضه حسيت ان صدري وجعني وخصوصا ان رنه تليفوني صوتها عالي ، بصيت في الموبايل لقيتها سحر .
رديت عليها وانا بحاول امسك نفسي ، صوتها كان متغير وقالتلي ان والدتها تعبانه وهي مش عارفه تتصرف ، حسيت ان ده طوق نجاه عشان انزل من الشقه ، قفلت المكالمه مع سحر وغيرت هدومي بسرعه واخدت بعضي ونزلت جري من الشقه وانا حاسس اني استريحت لما نزلت ، وروحت عند سحر في بيت والدتها واخدتها ونزلنا للدكتور .
التشخيص بتاعها كان عباره عن نزله معويه حاده ، والدكتور قال يا ريت متسيبوهاش لوحدها في البيت وتبقوا معاها تراعوها لحد ما تسترد صحتها ، وخرجنا من عند الدكتور وجيبنا العلاج ورجعنا علي بيت حماتي ، وطبعا اتفقت مع سحر اني هبات معاها اليوم ده عشان خلاص احنا كنا وصلنا للساعه ثلاثه ونص الفجر ، ولما نصحي نشوف هنعمل ايه .
لان كان في اقتراحين ، يا اما ناخد حماتي شقتنا تعد معانا اسبوعين تلاته ، يا نجيب هدومنا ونعد معاها احنا ، واليوم خلص ودخلنا ننام ، انا في العادي مبحلمش ، ولو حتي حلمت مكنتش بفتكر الحلم بتاعي ، بس في اليوم ده حلمت بأكتر حلم مزعج حلمته في حياتي ، حلمت اني نايم في مكان ضلمه جدا ، والهوا اللي فيه تقيل ، وكنت حاسس بأنقباض في قلبي واني مش قادر اتنفس.
وفجاه ضرب نور احمر قوي جدا في المكان ، نور بلون الدم ، عشان اكتشف اني واقف في شقتنا ، كنت واقف في الصاله ، وشايف بعيني حاجات مرعبه جدا ، الحيطان بتاعت الصاله كانت بتنشع دم ، والدم مطرطش علي الكنبه والتليفزيون ، كنت حاسس بالخوف الشديد .
وبعدها بدأت اسمع صوت خبط جاي من اوضه النوم بتاعتي ، كان صوت خبط ورا بعضه كأنك بتدق حاجه بشاكوش ، بدأت اتحرك من الصاله وامشي ناحيه اوضه النوم ، اتحركت ببطء شديد زي مكون ماشي في ميه ، وقربت من باب اوضه النوم .
لقيت راجل شكله مخيف جدا واقف علي كرسي في نص الاوضه وبيدق حاجه شبه المسمار في السقف ، اول ما شافني بصلي في عنيا جامد ، وفجأه وبدون مقدمات راح ضاربني في دماغي بالشاكوش، انا من قوه الخبطه حسيت بدماغي بتوجعني جدا .
وصحيت من نومي وانا دماغي وجعاني وحاسس بألم شديد ، حاولت مبينش اي حاجه ولا احكي لسحر اي حاجه كفايه اللي هي فيه ، نزلت صليت الجمعه وقعدنا مع بعض وعدي اليوم هادي منغير اي مشاكل او احداث مش طبيعيه ، وعلي بالليل سحر قالتلي انها هتاخد والدتها عندنا في الشقه عشان شغلي ميبقاش بعيد اوي عن البيت وكمان هناك في بواب في العماره فمش هتبقي مضطره انها تنزل تجيب اي طلبات وتسيب والدتها لوحدها ، وفعلا يوم السبت حضرت هدوم والدتها وقفلنا شقتها وركبنا عربيتي وطلعنا علي المعادي ، لما وصلت العماره الاسانسير كان متعلق في الدور بتاعنا
دورت علي البواب ملقتهوش ، فقررت اني اطلع علي السلم واجيب الاسانسير احط فيه الشنط وحماتي تطلع فيه ، بس لما طلعت سمعت صوت طالع من شقتي ، كان صوت عالي جدا ، فتحت الباب ودخلت لقيت التليفزيون شغال وصوته عالي ، اكيد انا نسيت افصل الكهرباء عنه لما كان النور قاطع ولما الكهرباء رجعت اشتغل .
طفيت التليفزيون ولسه هخرج من باب الشقه لمحت حاجه وقفتني في مكاني ، لمحت الشمعه اللي كنت مولعها محطوطه علي الترابيزه مطرح ما سيبتها ، الغريب والمرعب اني لقيتها منوره ومش سايحه ، زي ما كون لسه مولعها حالا ، معقوله اكون نسيتها ومطفتش النار قبل ما انزل .
ولو ده حصل ، معقوله تكون مش سايحه ، واقفه سليمه زي ما هي ، وانا واقف مستغرب لقيت سحر بترنلي علي الموبايل ، فقت لثواني من التفكير وطفيت الشمعه ودخلتها المطبخ ، واخدت الاسانسير ونزلت ، حطيت الشنط ، وحماتي ركبت وطلعنا ، واحنا في الاسانسير لقيت سحر بتقولي مالك انت متغير ليه .
قولتلها مفيش حاجه عادي وسكت ، مرضتش احكيلها علي الحاجات الغريبه اللي بتحصل في الشقه دي عشان مخوفهاش ، دخلنا وغيرنا هدومنا وسحر حضرتلنا عشا وحماتي دخلت تنام في اوضه ساره وانا وسحر دخلنا اوضتنا عشان ننام .
الساعه بقت احداشر بالليل وانا عندي شغل الصبح ، بس بعد ما رحنا في النوم وحوالي الساعه واحده بالليل ، سمعت صوت جاي من الصاله ، كان صوت ضحك عالي ، استغربت وقمت من نومي ، بصيت علي سحر لقيتها نايمه جمبي ، معقوله تكون حماتي صحيت وقاعده بتتفرج علي التليفزيون ، قمت من سريري براحه منغير ما اصحي سحر ، وخرجت الصاله لقيت ساره قاعده في ركن الاوضه وهي بتضحك وقدامها لعبها .
قربت منها وانا مستغرب وسألتها انتي صاحيه دلوقتي ليه يا ساره وايه اللي طلعك من اوضتك ، بصتلي في براءه وقالتلي كنت بلعب مع مروان .
سألتها مروان مين يا حبيبتي ، قالتلي الولد اللي ساكن في الحيطه دي وشاورتلي علي الحيطه اللي جمب الشباك الكبير ، انا عارف ان ساره خيالها واسع وعندها اصحاب خياليين ، فطبطبت عليها واخدتها في حضني وقولتلها لازم تنامي انتي ومروان عشان الوقت اتأخر .
وشيلتها من مكانها ورحت ادخل بيها اوضه النوم بتاعتي عشان تنام جمبنا انا وامها ، بس قبل ما اتحرك من الصاله قالتلي استني يا بابا هعمل باباي لمروان ، وبصت علي الركن اللي كانت قاعده فيه وقالت باباي يا مروان ، فابتسمتلها وانا بقول معاها باي يا مروان روح نام ، ولسه هدخل الاوضه لمحت عربيه بلاستيك من لعب ساره اتحرك قدام عيني لوحدها حوالي خمسه سته سنتي .
وقفت مذهول من الموقف بس مردتش اعمل اي رد فعل عشان مخوفش ساره ، بس هي ضحكت بصوت عالي وقالتلي بابا مروان بيعملك باباي ، حاولت اني اتصرف طبيعي ، واخدتها ودخلت اوضتنا ، اول ما دخلت جمبي نامت ، وانا فضلت صاحي بفكر في اللي بيحصل ده ، اكيد في حاجه مش صح ، كميه الاحداث دي مرعبه
كنت نايم ومدي ضهري لساره ، فحسيت بها وهي بتحضني من ضهري ، ابتسمت وانا فرحان ببنتي اللي بتتحامي فيا ، بس فجأه بدات احس ان قبضه اديها بتتقل علي ضهري ، وفجأه لقيت اديها طولت ولفتها كلها حوالين ضهري وبطني ، حاولت اتحرك من مكاني وابص عليها ، بس هي كانت اقوي مني بكتير وقدرت تكتفني في مكاني .
وفجأه حسيت بنفسها جمب ودني ، كنت سامع صوت نفسها في ودني وانا خايف حتي احاول الف ابص عليها ، فتحت بقها واتكلمت ، بس مكنش بصوتها الطفولي ، اتكلمت بصوت خشن وتخين ، الصوت كان قاسي وقوي جدا ، اتكلمت وقالتلي ، امشي من هنا والا هتموتوا كلكو ، مش مسمحولكو انو تفضلوا موجودين هنا .
