ما يحدث بعد منتصف الليل لم يكن في العقد!»
ساعتها انا صرخت من الرعب ، ومن قوه صرختي صحيت من النوم ، انا مش فاكر نمت امتي ولا نمت ازاي ، حاسس اني كل الاحداث دخلت في بعضها لدرجه اني مش قادر احدد الفرق بين الواقع والحلم ، بصيت في الساعه لقيتني متأخر علي شغلي ، ولاحظت ان ساره مش موجوده جمبي .
صحيت سحر وقولتلها ساره فين ، قالتلي فين ازاي مهي نايمه جمب ماما ، قولتلها لا دي جات تنام جمبنا بالليل ، قامت من مكانها وراحت اوضه ساره وبعدها رجعت قالتلي ساره نايمه جمب ماما ، فاطمنت ولبست ونزلت شغلي ، ولما روحت بالليل كانت سحر متغيره شويه ، كان باين عليها ، سألتها مالك طبعا مردتش عليا ، انا كلمتها طول النهار اربع او خمس مكالمات وكانت طبيعيه ، مفيهاش حاجه .
بس لما ضغط عليها حكتلي ، قالتلي بعد ما انت نزلت ، دخلت اكمل نومي ، فبعد ما رحت في النوم سمعت صوت ميه جاي من الحمام ، فاستغربت وقومت اشوف في ايه ، خبطت علي باب الحمام واتفاجئت ان انت اللي بترد عليا .
سألتك هو انت منزلتش ، بس محدش رد عليا ، خبطت تاني ومحدش رد ، فمدت اديها وفتحت الباب لقت الحمام فاضي ، والدش شغال ، استغربت جدا وقفلت الدش ، وخرجت من الحمام ودخلت المطبخ عشان اعمل فطار ، بس قبل ما ادخل المطبخ لمحت حاجه زي واحده ست خرجت من الحمام بسرعه وجريت علي اوضه النوم .
اتفزعت جدا وخفت ، ودخلت اوضه النوم لقيتها فاضيه ، بس فضلت خايفه طول النهار ، وبعدها قالتلي انا حاسه ان في حاجه مش مظبوطه يا مؤمن ، حاولت اطمنها وافهمها ان دي تهيئات وان مفيش حاجه ومتقلقش ، مع اني انا كمان كنت خايف ، وعلي الغدا واحنا قاعدين حماتي كانت بتهزر مع ساره وبتقولها انتي طول الليل بتخبطيني وانتي نايمه انا مش هنيمك جمبي .
فانا قولتلها بهزار ، متقلقيش يا حماتي انا ريحتك منها طول الليل وكانت نايمه في حضني ، لقيت حماتي بتبصلي بأستغراب وقالتلي ازاي يا ابني ، انا طول الليل صاحيه وساره متحركتش من مكانها ، فقولتلها ازاي يعني انا صحيت لقيت ساره بتلعب في الصاله علي الساعه واحده واخدتها ودخلت اوضتنا ، حلفت بالله ان ساره متحركتش من مكانها .
بصيت لساره وقولتلها يا حبيبتي مش انتي جيتي نمتي في حضن بابا بالليل ، ردت البنت وقالتلي لا ، قولتلها لما عملنا باي باي لمروان ، لقيت البنت اتخضت ووشها قلب وقالتلي انت شفت مروان .
فسحر سألتها مروان مين ، ردت البنت وقالت ده ولد وحش اوي بيطلع بالليل من الحيطه دي ويخوفني وعاوز يلعب معايا بالعافيه وانا ببقي خايفه منه عشان عنده خرم هنا وشاورت علي صدرها ، بصينا لبعض انا وسحر ، وفي اللحظه دي سمعنا كلنا صوت حاجات بتتكسر في المطبخ .
الصوت كان عالي جدا بطريقه مرعبه طلعنا نجري علي المطبخ عشان نشوف في ايه ، بس قبل ما ندخل الممر اللي المطبخ في اخره النور قطع ، اتسمرنا في مكانا انا وساره ، وبعدها سمعنا صوت عياط طفل صغير جاي من اوضه النوم ، الصوت كان واضح اوي بطريقه مرعبه ، ولعت كشاف الموبايل وقربت من اوضه النوم ، بس قبل ما ادخلها لمحت طفل صغير طالع من الاوضه بيجري علي الحمام وفي سكينه مرشوقه في صدره .
انا من الرعب والخوف الموبايل وقع مني علي الارض وحسيت اني متخشب مكاني وسمعت صوت سحر بتصرخ بصوت مكتوم وهي حاطه اديها علي بقها من الخوف ، وقبل ما نتحرك احنا الانتين لقيت النور رجع ، بس اول ما النور رجع قلبنا وقع في رجلينا من الخوف ، لاننا لقينا حيطان الصاله والعفش غرقان بقع دم ناشف ، مكنتش عارف اعمل ايه ولا اتصرف ازاي .
انا كنت واقف بترعش ومرعوب من المنظر ، وفي ثانيه اتمالكت نفسي وقولت لسحر بقولك ايه احنا ملناش قعاد في الشقه دي ، دي مش اول حاجه غريبه تحصل ، اندهي امك وساره ويلا ننزل ، في اللحظه دي سمعت ساره بتصرخ ، جرينا انا وسحر لاوضه السفره لقينا ساره واقعه في الارض قدام باب الاوضه وهي بتعيط ، وبتشاور علي ركن الاوضه و بتترعش جامد .
رفعنا عنينا مطرح ما كانت ساره بتشاور ، لقيت حماتي طايره في الهوا ، ايوه والله الست الكبيره اللي معديه الخمسين سنه المريضه كانت طايره في الهوا ، شعرها متنعكش وعنيها بيضه تماما مفيهاش نني اسود .
واتكلمت بصوت غير صوتها ، صوت خشن تخين ، وقالت انا بأمركو انكو تسيبوا الشقه دي وتمشوا فورا انتو غير مرحب بيكو هنا ، ده مكانا ومش هنسمحلكو تعيشوا فيه ، وصرخت صرخه قويه جدا ، ومن قوه الصرخه والصوت ازاز الشقه كله فرقع واتكسر .
الكوبايات وازاز الشبابيك ودرف النيش ، ده حتي ازاز طربيزه السفره فرقع ، وبعدها حماتي وقعت من مكانها علي الارض ، جريت عليها وشيلتها وسحر اخدت ساره وطلعنا نجري من الشقه بهدوم البيت ، ركبنا العربيه وطيران علي شقه حماتي ، كنا مش مصدقين اللي حصل ، ايه اللي احنا شفناه ده ، حماتي فضلت نايمه طول الليل مصحيتش ، وانا كلمت السمسار اللي جابلنا الشقه وسألته علي تاريخ الشقه وقالي انه ميعرفش تاريخها .
بس معاه رقم الحاج عواد صاحب الشقه ، اخدت الرقم وكلمت الحاج عواد ، وحكيتله كل اللي حصل ، رد عليا وهو في منتهي الهدوء وكأني مكنتش بحكيله علي عفاريت ، قالي ان الشقه دي كانت بتاعت ابنه ، وابنه ده كان مدير حسابات في شركه كبيره ، وكان متعود يضارب بكل فلوسه في البورصه .
وفي يوم اكتشف انه خسر كل ثروته ، مكنش عارف يعمل ايه ، وعقله خف من الخساره دي ، وفي لحظه يأس قتل مراته وابنه مروان وانتحر في الشقه عشان كان خايف ميعرفش يصرف عليهم ، اول ما سمعت اسم مروان افتكرت كلام ساره علي طول ، علي الولد اللي اسمه مروان اللي بيخرج من الحيطه ، وبعدها ورث الشقه دي ، وباعها عشان متبقاش ذكري تفكره بموت ابنه الوحيد .
انا ساعتها اتخانقت معاه في التليفون وقولتله اني عاوز ارجع الشقه دي ، بس هو رفض وقالي انه اتبرع بفلوس الشقه كصدقه علي روح ابنه ، مكنتش عارف اتصرف ازاي وعدت اسابيع والشقه مقفوله ، لحد ما واحد اقترح عليا يجيب شيخ في الشقه يمكن يقدر يطرد اللي فيها ، وفعلا جبت شيخ وطلعنا الشقه ، الشيخ بدأ انه يرش ميه بملح خشن وولع بخور وقرأ قران ، بس للاسف في لحظات لقينا الشقه حرفيا بتتكسر علي دماغنا .
وبدأنا نحس بوجود تقيل اوي في الشقه فبدأ الشيخ يعلي صوته ويقرأ ايات التحصين اللي بنسمعها في الرقيه الشرعيه ، بس قبل ما يبدأ في القرأءه فجأه النور قطع ، والشقه ملها غرقت في ضلمه قويه جدا ، لسه هتحرك من مكاني سمعت الشيخ بيصرخ بصوت عالي وسمعت صوت ضرب وتكسير جامد جدا .
وبعدها النور اشتغل ولقيت الشيخ مرمي في الصاله ومش قادر يتحرك ، حاولت اسنده واخدته ونزلنا من الشقه ، وساعتها الشيخ نصحني وقالي ان الحضور الموجود فيها تقيل لانها ارواح ناس ساكنه في الشقه مش مجرد جن ، وانه مش هيقدر يطردهم منها او يطهر الشقه ، ونصحني وقال اني احاول ابيع الشقه ومدخلهاش تاني ، ومن ساعتها والشقه مقفوله وانا ومراتي وبنتي عايشين عند حماتي هنا ، ومش عارف اتصرف ازاي .
خايف اعرضها للبيع واللي يشتريها ابقي اذيته واشيل ذنبه ومش عارف استفيد بيها خالص ، ده حتي جيراني في العماره سابوا شققهم وعزلوا بعد الرعب اللي شافوه من الشقه وخصوصا بعد ما البواب بتاع العماره جاتله حاله نفسيه وانتحر ، وهي دي حكايتي مع شقه المعادي الملعونه دي ، ومن ساعتها مش عارف اتصرف ازاي.
