القط الأسود الذي تبعني من الشارع إلى الكوابيس
بالليل كنت راجع البيت, على مدخل الشارع كدا شوفت قط أسود كبير بيتمشى عادي بكل هدوء, ومن عادة القطط زي مانتوا عارفين إنها لما تشوف حد بتخاف وتجري, لكن القط دا مكانش زيهم, لدرجة إني مشيت جمبه قاصد أخوفه لكنه مخافش, افتكرته قط من سلالة معينة وحد مشتريه, عجبني بصراحة وقولت في نفسي يا بخت أصحابه, بس القطط اللي من النوعية دي مبتخرجش من البيت إلا نادرا يعني وصاحبه بيرجعه البيت على طول بمجرد ما يشوفه عشان ميهربش مثلا, لكن إيه اللي مطلعه لوحده في وقت زي دا؟ أكيد هرب.
وكأنه سمع الكلام اللي بقوله عليه, لإنه في نفس اللحظة لقيته وقف وبص عليا, عنينا اتثبتوا على بعض لمدة كام ثانية فاستغربت أكتر, لكن في النهاية سبته ومشيت وأنا بفكر فيه وبضرب كف على كف.
الغريب إنه جاني في الحلم, هو هو القط, كنا واقفين في مكان معرفوش وباصين على بعض, نفس النظرة اللي كانت بينا أول مرة, الحلم كان مرعب بصراحة, لأول مرة أخاف من قط, ولما صحيت من النوم جسمي كان بيتنفض وحسيت بتنميل في نصي التحتاني.
اتعدلت من النوم عشان أشرب مياه, الكوباية كانت على الكومودينو جمب مني ولما لفيت بجسمي عشان أمسكها شوفته, شوفته واقف على باب الأوضة, شوفته على النور الخفيف اللي جاي من لمبة الصالة, واقف وباصص في عيني نفس النظرة اللي بشوفها منه, اتمسمرت مكاني من الخوف وبعد شويه مشي, اللحظة دي عمري ما هنساها في حياتي, حسيت بعدها إن رجليا اتشلت, ونصي التحتاني مش حاسس بيه وجسمي برد فجأة وأعصابي كلها سابت واترميت على السرير ونسيت إني عطشان.
صحيت تاني يوم لقيت مراتي بتطمن عليا أكتر من مرة وتقولي مالك؟ أنت كويس؟ ولما سألتها عن السبب قالتلي أصلك بالليل كنت بتهلوس وتقول كلام مش مفهوم وغطيتك ببطانيتين وجسمك برضه بيتنفض لولا ما غطيتك بالتالته, لما قالتلي كدا افتكرت القط وياريتني ما افتكرته, في البداية افتكرت اللي حصل معايا بالليل دا كان كابوس لكن لما فوقت من النوم افتكرت إني شوفته بالليل قبل ما ارجع البيت.
حكيت اللي حصل معايا لواحد صاحبي, اتفاجئ وقالي يخرب بيتك وأنت ليه تركز معاه؟ قلتله ليه يعني؟ قالي عشان دا عفريت وطلع لفلان قبل كدا على هيئة راجل أسود قاعد تحت شباك بيتهم وحاول ينادي عليه أو يعرف هو مين وفجأة اختفى من قدام عينيه.
وطلع لفلان على هيئة قط أسود بنفس المواصفات بتاعتك دي وجري عليه كأنه هياكله وصاحبنا من الموقف وقف مكانه ولما القط وصل عنده اختفى وبعدها المسكين قعد تلات أيام تعبان.
كلام صاحبي وهمني بصراحة, عايز أقولكوا إن لمدة عشرين يوم أو أكتر والقط دا بيجلي في كوابيسي, لدرجة إني كنت بخاف أنام, كن بهلوس بيه وأنا صاحي ونايم, شيوخ كتير روحتلهم ومحدش فيهم فادني بحاجة لحد ما مشي لوحده وبطلت أشوفه تاني الحمد لله.
