“كريمة: عروسة حملت طفلًا… وحملت معها أسرار بيتٍ قاتل”
كريمة بنت المنوفية، عروسة الاربع شهور وضحية العنف
جريمة جديدة تهز محافظة المنوفية لعروسة حامل في شهرها التاني تموت بسبب عنف وضرب زوجها ليها.
طب هل جوزها بس القاتل؟
لأ
الأربعة الـ قصادك دول اشتركوا في الجريمة “الام.. الجارة.. الحماة.. الزوج”
معقول في ام تشترك في قتل بنتها!
ايوا في امهات بتشترك في موت بناتها لما يسكتوا عن حقوقهم ويسبوهم في بيوت السفاحين.
الام قالت بنفسها:
_بنتي ليلة دخلتها حماتها وسلفتها سهروا عندها لحد الصبح
وتاني يوم صحوها بدري تقوم تعملهم محشي وهي نصحتها وقالتلها “وماله يا حبيبتي أهل جوزك وعزوتك ميضرش”
وجت اشتكت أنه ضربها وأنه بيهددها يرميها من البلكونة، والام قالت “يمكن متعصب يا حبيبتي ده كلام في الهوا”
مقدرتش تحمي بنتها الـ بتتهان من اول ليلة،
معرفتش تحطلها حدود وتقول بنتي إنسانة مش حيوانة وليها خصوصيتها واحترامها.
معرفتش تقولها أن مش الطبيعي الزوج يضرب ويعنف زوجته على اقل سبب
وسابتها تعيش وتكمل علشان متاخدش لقب “مطلقة”، لحد ما راحت منها خالص وماتت.
“وكده نقدر نأكد أن الأم طرف مشترك في الجريمة”.
_الحماة العمى على أصولها:
وشها لوحده يقبض القلب ويقول إن العروسة دي عاشت اسوء اربع شهور في الدنيا.
دخلت بيتها تفتش حللها وتقول “بيأكلها كفتة وفراخ والله”، وكأن ده سبب كافي لبراءة أبنها.
حاولت تطلع نفسها ملاك بشكل مش لايق عليها وقالت “دانا كنت بمسحلها واقولها اؤمري يا كريمة دانا مقدرش استغنى عن الرماد الـ بتمشي عليه ” (طبعاً ده الرماد الـ ناتج عن الحىرايق الـ بترميها فيها علشان ملهاش تفسير غير كده).
قالت كمان بكل فخر “دي بتاخد ٢٠٠ جنيه في الاسبوع”، ولما المذيعة قالت لها “٢٠٠ جنيه يعملوا ايه يا حجة”
قلبت وشها وقالت ما اكلها وشربها من عندي (يعني قدرتي تعترفي انك متحكمة في بيتها وماسكة مصروفها ومتدخلة في كل شؤونها زي الخنازير اللي بيحشروا مناخيرهم في كل شئ)
“وده تأكيد أنها طرف في الجريمة”.
_الزوج المجرم الأساسي.. أو هنسميه “الطور الاوسترادي”
زوجة أربع شهور تتضرب اكتر من مرة
وتنزلها من صباحيتها تخدم أهلها
والجيران يسمعوا صوت صريخها كل ليلة وهي بتستنجد بحد يلحقها، يبقى أنت تستحق الإعدام زي ما قتلت إبنك ومراتك.
_الجارة عواطف:
انتي كمان يا حجة عواطف مشتركة في قتل البريئة كريمة
ودمها متعلق في رقبتك علشان شهدتي زور لما قولتي “ده بيجبلها اندومي وشيبسي وعيط عليها والله”
والله؟
يعني الشارع كله شهد أنه اتلم على صوت صريخها وكل شوية تضرب، وانتي بتحاولي توصليلنا أنه كان احن زوج بالاندومي؟
روحي ربنا يرزقك باللي يجبلك اندومي وشيبسي بردو ويخلصنا منك يا عديمة الضمير.
جريمة كل أطرافها أبشع من بعض
بداية من أمها اللي سابتها لحد ما ماتت في بيت واحد معندوش قلب ولا دين
لحماتها اللي الشر خارج من ملامحها
لجوزها اللي خدها كخدامة مش زوجة
رحمة الله عليكي يا كريمة،
يارب يبدلك اهل خيراً من أهلك
وبيت خيرا من بيتك
وينور قبرك ويردلك حقك من كل ظالمينك.
